Skol Diwan gwened

Donemat àr lec’hienn skol Diwan Gwened !

Adalek an oad a zaou vlez e vez degemeret ar vugale er skol-vamm betek ar CM2.

Un aergelc’h aketus hag hegarat a ginnig ar skipailh pedagogel. Kevredigezhel ha laik eo hor skol. Ar c’helenn a zo digoust ha digor d’an holl, peadra da aesaat ar c’hemmesk sokial, ur binvidigezh evit ar vugale.

Digor eo ar skol d’an holl, brezhonegerion pe pas.

Ken efedus eo ar soubidigezh ma c’hell ar skolidi tizhout ul live yezh par d’o live e galleg.

Mestroniet e vez en div yezh ar pezh a c’hortozer e-kreiz ar c’helc’hiad 3 (CM2).

Ar saozneg a vez studiet a-hed ar c’hursus ivez.

Talvoudoù desavadurel ha raktres pedagogel

Frouezhus eo al lieslive : broudet eo ar skolidi da vezañ ragoberiant hag emren.

Get an aozadur-se eo aesaet degemer ar re vihan tout er skol-vamm peogwir int frealzet é welet ar re arall hag e c’hellont kemer skwer àrne. Er c’hentañ derez e tesker da labourat en un doare emren, hervez lusk pep hini. Talvoudekaet eo ar re vras hag heñchet ar re yaouankañ. Pep hini a gav e lod ha kreñvoc’h eo al liammoù a vignoniezh etre al liveoù.

Gweladennoù ha beajoù a vez aozet alies get ar skipailh pedagogel èl da skwer : gweladenn ti-feurm ar Visenn evit ar re vihan, sinema e brezhoneg, beajoù evit re ar c’hentañ derez (Enez Arzh e 2024), devezhioù dibenn-blez evit an holl e koad Kamorzh (2025)…

Atalieroù a vez aozet alies ivez get kevelerion (Kêr Gwened, Mor bihan – Gwened Tolpad…) Atalieroù echedoù, abadennoù e mediaoueg Beaupré Lalande, Bagoù dre lien er “mouette sinagote”…